عطر المحبه

الجزء الثالث من التلميذه

التفت صوبها
و اهو ياخذ المفتاح من الارض

آآه يا نوف
يا حب انزرع باليوف
انتي اللي ما اختلف فيج
لا العقل و لا القلب و لا حتى الروح
ما اجذب و اقول حبي الاول
و لا الثاني
لكنج انتي حب زماني
حب اوجد لي كياني
انتي معدن يملك كل المعاني
و ابتديت افهم
افقه ان الحب قوه شديده
و ان مو الكل يوصل للنهاية السعيده
نوف
تراني انا كلي لج
تيار جرفني باتجاهج
و بات الحلم ينكتب لج

فتح باب المكتب

" حياج "
صوته اصطبغ بالبحه تعطر المحيط بالفه لذيذه
" يحييك مشكور "
صوتها لم يكن لها كانه قادم من بعيد

يتجهه لمكتبه
" تفضلي استريحي بس اجيك على البريد "

" اخذ راحتك "

اخذ راحتي؟
يضحك في سره على عبارتها تلك
و يتساءل
من قال اني ابي راحتي
خليها عندج
تدفى بوجودج
متى اخر فتره كانت راحتي معاي؟
مممم
اول ما تخرجت و رديت للكويت
وقتها لقيت اهلي كلهم حولي
امي تدعي لي بالتوفيج
و الزواج اللي يهنيني و اهنيه
بس ترد و تقول لا لا ما شبعت منك للحين
و اختي توصيني اخذ بالي من البنات
اذكر كلامها للحين

" يا مالك و حركات البزع اللي بتتنهوص و اللي تتدلع"

" بس انت اجعم و لا تعطيهم مبسم"

تالي بعد جم يوم قالت لي

" انت شعايلك على الزواج الحين
خلك معانا نعيش يومين بدون ارتباطات
و نكون احلى اخوين "

نوف تدرين لما اخت تطلب من اخوها شي
يحس انه ودها يملك العالم و يهديه لها
الاخوه شي جميل
وقتها كانت راحتي معاي
كنت بعدي ما عرفتج
و لا حتى تمنيت القى طيفج
ما كنت متصور انج انتي ممكن تكونين
بدنيا الواقع تعيشين
و بديت مشوار التعليم بالحرم الجامعي
و انتي اكيد تدرين
اختي ما كانت تجذب لما قالت اغلب البنات عياريين
كنت اضحك
خصوصا ان اهلي كانو مقنعيني اني ما افكر ببنت تحت الخمسه و عشرين
و بعدين كانو كلهم تافهين
لين درستج
حينها بس اعترفت ان البنات مختلفين
مو قصة شكل و حلوين
لانه بالشكل وايد بنات حلوين
كنتي غير
تفكيرج تحدي
يرهب الرياييل
و انا ريال
ما اختلف عن الباجين
احبج اي
بس اهابج

رغم اني ما قلت لاحد عنج
ابد ابد
ما قويت انطق باسمج
رغم هذا هاجموج بدون لا يعرفون
شي غريب
حتى الجامعه باتو يعرفون
يمكن الحب مثل العطر
ما احد يقوى يمنع عطر من انه يفوح

يكتشف انه ما قرى و لا كلمة من الاوراق اللي جدامه
فيرفع راسه لها
يلقاها تناظر الدريشه
بعيون دامعه